Bufón, pallaso, improvisador
e narrador oral

Nacín en Cangas no ano 1981. Como di en grande máis arriba, son pallaso, bufón, improvisador e narrador oral. E tamén licenciado en Matemáticas, para quen lle poida interesar.

Formeime (fun collendo forma) a medio camiño entre Santiago de Compostela e Buenos Aires, con todo este elenco de mestres:
Teatro-clown: Marcelo Savignone, Walter Velázquez, Loco Brusca, Marcelo Katz, Maite Guevara.
Improvisación teatral: Omar Galván, Feña Ortalli, Gonzalo Rodolico, Jorge Costa, Pablo Pudnik, Al Tran Trán, Beto Urrea, Gigio Giraldo, Improptu (Costa Rica), Sergio Páris (Perú).
Narración oral: Sole Felloza
Malabares: Totó, Marco Paoletti, Stefan Sing, Maksim Komaró, Ville Walo.
Outras formacións: Xenia Tártari (claqué); Fabiana Gastaldello (pantomima).

Circo e clown

No ano 2003 fundei a compañía de circo Assircópatas coa que creei 8 espectáculos ó longo destes 20 anos. Entre eles: Montagem, Polos pelos, Abracadaver ou Rogelio, un pallaso en recuperación.

Grazas a estes espectáculos saín de casa e viaxei por 15 países.

Fundei a cía. Muu tamén de circo no ano 2019 creando o espectáculo Crunch!.

Participei en distintas redes culturais: Rede de Teatros e Auditorios de Galicia, Cultura no camiño, Rede Cultural de Euskadi e en moitos festivais por toda a península: Cucha de primavera (Úbeda), Festival de Teatro de Palencia, Mais Imaginarius (Portugal), Artenbitrir (Valencia), etc… así como no estranxeiro.

Como docente impartín clases de malabares en Buenos Aires e alí participei en distintos cabarets organizados por colectivos e asociacións locais.

Improvisación teatral

Adentreime noutros campos coma a improvisación coa que fundei a compañía The Momento Impro no ano 2012. Actúando cada mércores durante 8 anos no cafe bar Camalea de Compostela.

Impartín clases durante varios anos e actuei nas montaxes do Centro Drámatico Galego con Improvisións. Participei dous anos no encontro nacional de improvisación teatral de Zaragoza. Fixen versións no Salón Teatro de A Peste e Ás oito cando morren as nais . Participei en festivais internacionais como o Festival Internacional de Improvisación Teatral da República Dominicana no ano 2022.

Creei espectáculos como Entreliñas no ano 2015 ou Absurdia no 2023, xunto con Antón Coucheiro e Arturo Cobas, co que se inagura o Festival VadeImpro de Valladolid dese mesmo ano.

Narración oral

Formeime con Sole Felloza despois de que me entrase o gusanillo facendo un curso con Héctor Urién. Son membro de NOGA (Asociación de Narración Oral Galega).

Participei en festivais como o Atlántica escribindo os meus propios contos para adultos que publiquei no libro Murmuraban as miñas veciñas no ano 2022. Neste mesmo ano creei espectáculos infantís de narración coma Historias desde o outro lado da raia, Se o cantaro non vai a fonte… ou coa Cía Diáspora Escena O Peirao. Tamén espectáculos para público adulto como Pequenas historias subversivas, Ondas para mudar ou Murmurban as miñas veciñas.

Como di miña nai:
-Este dálle a todo.